Сенат төрағасы – Мәулен Әшімбаев. Президент Қасым-Жомарт Тоқаев Сенат спикері лауазымына Мәулен Сағатханұлының кандидатурасын ұсынды. Депутаттар оны бірауыздан қолдады.
Жуырда жоғары палата депутаттарының бір бөлігі сайланды. Қасым-Жомарт Тоқаевтың Жарлығымен бірнеше сенатор тағайындалды. Президент осымен Сенат құрамын жаңғырту үдерісі аяқталғанын айтты.
Қасым-Жомарт ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Бұл палата мемлекеттік басқару саласында айрықша рөл атқарады. Оған Конституцияға сәйкес маңызды міндеттер жүктелген. Заң шығару қызметін сапалы атқару үшін барлық жағдай жасалған. Палата өз жұмысын абыроймен атқарып келе жатыр. Сенаторлар ауқымды реформаларды жүзеге асыруға белсене атсалысты. Осы орайда баршаңызға шынайы ризашылығымды білдіремін. Жаңа депутаттар Сенаттың қызметіне тың серпін береді деп сенемін.
Елімізде «Күшті Президент – ықпалды Парламент – есеп беретін Үкімет» қағидаты орнықты. Мемлекет басшысы бұл реформалар билік институттары жүйесінің тепе-теңдігін қалыптастырады - дейді. Мәжіліс пен мәслихат депутаттарының сайлауы негізгі мемлекеттік институттарды кешенді түрде жаңғыртудың соңғы сатысы болатынын айтты.
Қасым-Жомарт ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Саяси жүйені орнықты дамыту ісінде партиялар маңызды рөл атқарады. Осы орайда елімізге жауапкершілігі жоғары партиялар қажет. Олар халықтың мүддесін тиімді қорғай білуге тиіс.
Президент саясаткерлердің жаңа буынын қалыптастырып, оларды елге таныту аса маңызды іс екенін еске салды. Елдегі партиялардың көбінде мемлекетшілдік ұстаным бар екенін айтып, алдағы сайлауда партиялардың бәріне бірдей мүмкіндік беріледі – деді.
Қасым-Жомарт ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Мәжіліс пен мәслихат сайлауы жаңа әрі әділ ереже бойынша өтеді. Алдағы сайлауды Қазақстан парламентаризмі тарихындағы жаңа кезеңнің бастауы деуге болады. Қоғамның түрлі өкілдерінің мүддесін партиялар арқылы қорғау мүмкіндігі артады. Мұның бәрі саяси жүйенің орнықты және тиімді болуын қамтамасыз етеді.
«Сайлау елді бөлетін емес, біріктіретін науқан болуы керек». Осылай деген Мемлекет басшысы үміткерлерді қоғамға іріткі салатын әрекеттен аулақ болуға шақырды. Сонда азаматтардың елдік саясатқа деген сенімі артады. Ал сенім – аса маңызды құндылық.
А. Задабек
