Алматы облысы Боралдай кентінің тұрғындары көпқабатты үйдің 1 бөлмелі пәтерінде 30-ға жуық ит асырап отырған азаматқа қатысты шағым айтты, деп хабарлады turkystan.kz.
Көршілерін әлекке салған Сергейдің сан итін серуендетіп бара жатқандағы видеосы да бар. Көршілері айтқандай-ақ, әр адамға агрессивті жауап қатып, иттерін айтақтайтын көрінеді. Төрт аяқтылар адам қауып жатса да, түк болмағандай тайраңдап жүрген азаматқа бір шара қолдануды талап етті.
«Біреуі келіп тістеп алды. Иесіне айтсам, «қайсысы тістеп алды» деп күліп тұр. Маған иттің тістегені емес, иесінің сөзі батты. Тірсектен тістеді, ізі де бар», – деді зардап шегуші Құрманбай Жолтаев.
«Көршінің келгеніне 20 жыл болды. Басында мысық әкелген. Енді ит асырап жүр, саны жиырмадан асады. Аулада қаншама адамды ит қапты», – деді көршісі Нұрбибі Байғанова.
«Алматы» арнасының мәліметінше, жұқпалы ауру жұғады деп жұрт мал дәрігеріне де жүгінген. Алайда мамандар да қауқарсыз болып шыққан. Өйткені заң бойынша олар ит иесін жазаға тарта алмайды, тек вакцина мерзімін қарайды.
«Пәтерінің есігін ашпайды. Ішке кіргізбейді. Көпқабатты үйде бір қожайынға бір ит асырауға болады», – деді Боралдай ауылдық округінің мал дәрігері Ермұрат Ғабитұлы.
«Түрлі жағдай болды, біреуі қауып алды. Ол кісіге тиісті шара қолданған. Тұрғындар жазған арыз бойынша тиісті шара қолданамыз», – деді Боралдай ауылының учаскелік полиция инспекторы Асқар Әлімбек.
Боралдай ауылдық округінің әкімі мәселеден хабардар. Алайда түскен арызға сай тек айыппұл салумен шектелетінін айтты. Себебі заң тұрғысынан жазаны сот қолданады.
«Ломоносов көшесіндегі көпқабатты үйдің бірінде ауыл азаматы көп ит асырап отырғанын білеміз. Бұл мәселе оңай емес, заңмен де қорғалатын тұсы бар. Тұрғындармен бірлесіп, сот арқылы шешуге тырысамыз», – деді Боралдай кентінің әкімі Данияр Қоңырбаев.
