Спорт Қазақстан
$449.58 €486.94 ₽4.86
×

Атырауда жылқыны аяусыз ұрған қасапшылар жазадан сытылып кетті

AstanaTV
03.02.2020ж. 20:00
3024
Атырауда жылқыны аяусыз ұрған қасапшылар жазадан сытылып кетті

Атырауда жылқының басынан темір балғамен ұрып азаптаған қасапшы жазадан сытылып кетті. Сотқа дейінгі тергеу амалдарын жүргізген құқық қорғаушылар істі тоқтатты. Қазір қасапхана қайта жұмысына кіріскен. 

Қасапханада жануарға жасалған қатігездік көпшіліктің әлі есінде. Төрт түліктің төресін азаптаған видео әлеуметтік желіде халықтың ашуын туғызған болатын. Тиісті орган мамандары аяқтан тік тұрды. Жаппай тексеріс жүргізіп, мал соятын орынды уақытша жауып тастаған еді.

Сол сәтте полиция департаменті «Жануарларға қатігездік жасау» бабымен іс қозғады. Тіпті видеодағы қасапшыны ұстап, жауап алған болатын. Алайда араға екі ай салып іс тоқтатылды.

Гүлнәзира МҰХТАРОВА, АТЫРАУ ОБЛЫСТЫҚ ПОЛИЦИЯ ДЕПАРТАМЕНТІ БАСПАСӨЗ ҚЫЗМЕТІНІҢ ӨКІЛІ:

 
Тергеу нәтижелерімен қылмыстық процестік кодекстің 35-бабы 1- бөлігі 2 тармағы  негізінде қылмыстық теріс қылықтың құрамы  болмауына байланысты өндірістен тоқтатылды. Аталмыш цех қызметкерлеріне профилактикалық құқықтық түсіндіру жұмыстары жүргізілді.

Бірақ полицейлер нені түсіндіріп жүргендерін ашып айтпады. Тергеу материалдарына сүйенсек, малды союдың тәртібіне сай оны бауыздамас бұрын, естен тандырады. Механикалық, электрлік тәсілдер немесе үлкен балғамен де соғып жығуға болады екен. Бұл - қасапшының қауіпсіздігі үшін жасалатын әрекет деп түсіндірді. Алматылық еріктілер мұндай қатыгездікті тоқтату үшін талай табалдырықты тоздырғандарын айтады.

Евгения КАЛИНИЧЕНКО, ЕРІКТІ:

Жануарларды қорғаушылар, қорлар, еріктілер, жанашыр қарапайым адамдар Қылмыстық Кодекстің бұл бабы жұмыс істегенін талап етіп келеді. Осы бап бойынша жан-жануарға қатігездік жасайындар қылмыстық жауапкершілікке тартылсын,- дейді. Алайда бап бар, бірақ ол жұмыс істемейді. Біз әкімдікке де, прокуратураға да арыз жаздық. Бірақ әзірге ешқандай нәтиже болмай тұр. 


Жылқыларды бірінен соң бірін ұрып құлатқан мал сою орны - мынау. Махамбет ауданы Береке ауылында орналасқан.  Қасапхананың жұмыс істеп тұрғанын аңғару қиын емес. Аулада жылқы, тіпті түйе де қамаулы тұр.

Мал сою пунктінің иесі сұхбат беруден бас тартты. Алайда қасапхананың жабылмағанын айтты. Ал малды азаптаған қасапшы - Өзбекстан азаматы болған. Оны еліне қайтарып жіберген.

Б. Надирқызы